Revelasion 9 KreyolAyisyen
🔊 Revelasion 9
KreyolAyisyen
0:00
0:00
- 1 Senkyèm zanj lan sonnen kònen klewon l' lan, epi mwen wè yon zetwal tonbe soti nan syèl la sou latè. Yo ba li kle twou san fon an.
- 2 Epi li louvri twou san fon an; epi yon lafimen monte soti nan twou a, tankou lafimen yon gwo founo; epi solèy la ak lè a vin tou nwa akòz lafimen twou a.
- 3 Epi krikèt vèt soti nan lafimen an, yo gaye toupatou sou latè. Yo te ba yo pouvwa, menm jan ak eskòpyon ki sou latè.
- 4 Epi yo te ba yo lòd pou yo pa fè zèb ki sou latè a mal, ni okenn plant vèt, ni okenn pyebwa; sèlman moun ki pa gen mak Bondye a sou fwon yo.
- 5 Yo pa t' gen dwa touye yo, men yo te gen dwa soufri pandan senk mwa. Touman yo te tankou yon eskòpyon ki blese yon moun.
- 6 Epi nan jou sa yo moun va chache lanmò, men yo p'ap jwenn li; y'a anvi mouri, men lanmò va kouri kite yo.
- 7 Fòm krikèt yo te sanble ak chwal ki pare pou goumen; sou tèt yo te gen kouwòn ki sanble ak lò, figi yo te tankou figi moun.
- 8 Epi yo te gen cheve tankou cheve fanm, epi dan yo te tankou dan lyon.
- 9 Epi yo te gen plak pwotèj pwatrin, tankou plak pwotèj an fè; epi bri zèl yo te tankou bri cha lagè ak yon pakèt chwal k ap kouri al nan batay.
- 10 Yo te gen ke tankou eskòpyon, epi te gen pikan nan ke yo. Yo te gen pouvwa pou fè moun mal pandan senk mwa.
- 11 Yo te gen yon wa alatèt yo. Se te zanj twou san fon an. Nan lang ebre, yo rele l' Abadon, men nan lang grèk, yo rele l' Apolyon.
- 12 Yon malè fin pase; epi gade, gen de lòt malè ki vini apre sa.
- 13 Epi sizyèm zanj lan sonnen kònen klewon l' lan. Mwen tande yon vwa ki soti nan kat kòn lotèl an lò ki te devan Bondye a.
- 14 Li t'ap di sizyèm zanj ki te gen twonpèt la: Lage kat zanj ki mare nan gwo larivyè Lefrat la.
- 15 Epi yo lage kat zanj yo. Yo te pare yo pou yon lè, yon jou, yon mwa ak yon ane, pou yo te ka touye yon tyè nan lèzòm.
- 16 Epi kantite lame kavalye a te desan milyon. Mwen tande kantite yo te genyen.
- 17 Epi, men sa mwen te wè chwal yo nan vizyon an, ansanm ak moun ki te chita sou yo. Yo te gen plak pwotèj pwatrin yo ki te fèt ak dife, ak jasent ak souf. Tèt chwal yo te tankou tèt lyon. Dife, lafimen ak souf t'ap soti nan bouch yo.
- 18 Twa bagay sa yo te touye yon tyè nan moun yo: dife, lafimen ak souf ki t'ap soti nan bouch yo.
- 19 Paske pouvwa yo te nan bouch yo ak nan ke yo. Ke yo te sanble ak sèpan, yo te gen tèt, epi yo te konn fè mal.
- 20 Lòt moun ki pa t mouri anba kalamite sa yo, yo pa t repanti pou sa yo te fè ak men yo, pou yo pa adore dyab ak zidòl ki fèt an lò, an ajan, an kuiv, an wòch ak an bwa. Zidòl sa yo pa ka ni wè, ni tande, ni mache.
- 21 Yo pa t' repanti ni pou touye moun yo, ni pou maji yo, ni pou fònikasyon yo, ni pou vòl yo.